முருகையா தேவஸ்தான திருவூஞ்சல் பாடல்கள்!

நாகர்கோவில் வடக்கு அருள்மிகு முருகையா தேவஸ்தான திருவூஞசல் பாடல்களை வெளியிடுவதில் மகிழ்வடைகின்றோம். இப்பாடல்களை ஓய்வுபெற்ற உப அதிபரான வடநாகைச் செல்வி கந்தசாமி அன்னலட்சுமி அவர்கள் இயற்றியுள்ளார். அத்துடன்  கோப்பாய் ஆசிரியர் பயிற்சிக் கலாசாலையின் ஓய்வுபெற்ற போதனாசிரியையான செல்வி நல்லையா நிர்மலாதேவி அவர்கள் ஒப்புநோக்கியுள்ளார்.

இத்திருவூஞ்சல் பாடல்களில் எமது ஆலயத்தின் இயற்கை வனப்புக்களையும், முருகையாவின் சிறப்புக்களையும், ஊரின் மகிமைகளையும்  வெளிப்படுத்தியுள்ளமை சிறப்பம்சமாகும்.

இப்பாடல்களை மிக நேர்த்தியாகவும் பண்ணுக்கு அமைவாகவும் ஆக்கித் தந்துள்ள இவ்விரு ஆசான்களுக்கும் ஆலய நிர்வாகசபை மிகவும் நன்றியறிதலையும் பாராட்டுகளையும் தெரிவித்துக்கொள்வதுடன், எல்லாம்வல்ல வள்ளி தேவசேனா சமேத முருகையாவின் கிருபாகடாட்சமும் கிடைக்கவேண்டுமென பிரார்த்திக்கின்றோம்.

நாகர்கோவில் வடக்கு அருள்மிகு முருகையா தேவஸ்தானம்

              திருவூஞ்சல் பாடல்கள்

                  திருச்சிற்றம்பலம்

செந்தமிழும் சிவநெறியும் சிறப்புற் றோங்கிச்
      சீர்பெருகும் வடமராட்சி மண்ணின் கீழ்பால்
நந்தமிழை நமக்கீந்த வள்ளல் செவ்வேள்
      நலம் பெருக வடநாகர் பதியில் நின்று
சந்ததமும் அருள் புரியும் கோவில் தன்னில்
      தமிழாலே திருவூஞ்சல் பாடி ஏத்த
தந்திமுகக் கணபதியே கௌத்தந் துறை
     தன்னிலுறை பரம்பொருளே காப்பதாமே.                          01

சதுர் மறைகள் நான்கினையும் தூண்களாக்கி
    தக்ககலை ஞானமதை வளையதாக்கி
ஆகமத்தின் மெய்ப்பொருளைக் கயிறாய்க் கொண்டு
    அருமைமிகு பிரணவமாம் பீடத்தேற்றி
அழகுறவே அமைத்த திருவூஞ்சல் மீது
    அடியவர்கள் அகமகிழ்ந்து உவகை பொங்க
நலம் பெருக இனிதமர்ந்து அருள் பாலிக்கும்
     நாகர்கோவில் முருகையா ஆடீர் ஊஞ்சல்.                      02

ஆத்திமரம் தனில் காற்று மோதி வந்து
     அருகிருக்கும் உணா மரத்தில் பூக்கள் சிந்தி
வேப்பமரக் கிளைதோறும் தாவித் தாவி
     வேலவனின் கோவிலிலே சுகத்தைச் செய்ய
தென்புறத்தின் மணற்குன்றில் உயில் மரங்கள்
     தேவாதி தேவன் என உனை இறைஞ்ச
நாற்றிசையில் உள்ளோரும் புகழ்ந்து ஏத்தும்
      நாகர்கோவில் முருகையா ஆடீர் ஊஞ்சல்.                    03

நாற்புறமும் குடிமனைகள் சூழ்ந்திலங்க
      நடுவினிலே நீயிருந்து அருள் பாலிக்க
காற்றினிலே வரும் காண்டா மணியினோசை
      காதினிலே கேட்டவுடன் அடியாரெல்லாம்
போற்றி செய்து உன் பெயரை சொல்லிச் சொல்லி
     பெருமையுடன் தங்கருமம் தன்னைச் செய்வார்
ஆற்றல் கொண்டு நாகர்கோவில் பதியில் வாழும்
     அழகு முருகையா ஆடீர் ஊஞ்சல்.                                     04

அண்ணனாம் கணபதி உன்னருகில் நின்று
      அண்டிவரும் அடியவர்க்கு அருள் செய்கின்றான்
ஐயப்பன் என்றழைக்கும் தேவன் தானும்
      அங்கொருபால் வீற்றிருந்து எம்மைக் காக்க
மெஞ்ஞானம் எமக்களிக்கும் காளித் தாயும்
     மிகஉவந்து அடியவர்க்கு அருள் பாலிக்க
எஞ்ஞான்றும் எமைக் காக்கும் நாகர்கோவில்
     எழில் கொஞ்சும் முருகையா ஆடீர் ஊஞ்சல்.               05

தில்லையிலே திருநடனம் செய்யும் எங்கள்
       சிவபெருமான் தானும் சிவகாமி அம்மை
தன்னுடனே தோன்றி எங்கள் துன்பம் நீக்கி
      தருமநெறி தழைத்தோங்க வையம் வாழ
உள்ளமதில் கள்ளமில்லா வரமுந் தந்து
      உவகை பொங்க மாந்தரெலாம் சிறந்து வாழ
நல்லபடி உன்பதியில் கோவில் கொண்டார்
      நாகர்கோவில் முருகையா ஆடீர் ஊஞ்சல்.                  06

வல்லவராம் வயிரவரும் உந்தன் கோவில்
      வாசலிலே வீற்றிருந்து  எம்மைக் காக்க
சொல்லரிய துன்பமெலாம் போக்கி எங்கள்
      சோதனைகள் வேதனைகள் தீர்த்து என்றும்
அல்லலின்றி உன்னடியார் மகிழ்ந்து வாழ
      ஆறுபடை வீடு விட்டு இங்கு வந்து
தொல்லையின்றி நாகர்கோவில் மக்கள் வாழ
      துணையாகும் முருகையா ஆடீர் ஊஞ்சல்.                  07

கச்சியப்பர் என்ற சிவ அந்தணரும்
      கந்தபுராணம் பாட அருள் பாலித்தாய்
அருணகிரி என்றழைக்கும் அன்பன் உன்னை
     அடிபணிந்து தெண்டனிட அவனைக் காத்தாய்
சூரனையாட்கொண்டு தேவர் துன்பம் போக்கி
     துயர் துடைக்கும் தேவன் என்ற பேரும் பெற்றாய்
நல்ல தமிழ் ஔவைக்கும் கனியும் ஈந்தாய்
     நாகர்கோவில் முருகையா ஆடீர் ஊஞ்சல்.                   08

வள்ளி தெய்வ யானையுடன் இனிதமர்ந்து
        வாழ்வளிக்கும் எங்கள் குல முருகா போற்றி
உளமுருகி உனதடியார் இனிதிறைஞ்ச
       உலகெங்கும் பரந்துவாழ அருள்வாய் போற்றி
மணல்மேடு சிந்தும் அந்த அழகைக் கண்டு
       மயில் மீது சுற்றி வந்து அமர்ந்தாய் போற்றி
அலைமோதும் கடல்வளத்தால் சிறந்திலங்கும்
       நாகர்கோவில் முருகையா ஆடீர் ஊஞ்சல்.                 09

ஆறுமுகப் பரம்பொருளே ஆடீர் ஊஞ்சல்
      அன்பர் குறை தீர்ப்பவரே ஆடீர் ஊஞ்சல்
ஏறுமயில் விட்டுவந்து ஆடீர் ஊஞ்சல்
      ஏகதந்தன் தம்பியரே ஆடீர் ஊஞ்சல்
வள்ளி தெய்வ யானையுடன் ஆடீர் ஊஞ்சல்
      வண்ண மயில் வாகனனே ஆடீர் ஊஞ்சல்
நன்மை பல நாங்கள் பெற ஆடீர் ஊஞ்சல்
      நாகர்கோவில் முருகையா ஆடீர் ஊஞ்சல்.                 10

அந்தணரும் ஆவினமும் அரசும் வாழி
      அகல் விசும்பு மழைபொழிந்து அகிலம் வாழி
முந்து சைவம் தமிழ்மொழியும் சிறந்து வாழி
      முருகனடியார் செல்வம் செழித்து வாழி
எந்தையரும் தாய்மாரும் இனிதாய் வாழ்ந்த
      ஏற்றமிகு நாகர்கோவில் பதியும் வாழி
நன்னெறிகள் நானிலத்தில் மலிந்து வாழி
      நாகர்கோவில் முருகையா வாழி வாழி.                      11

                  திருச்சிற்றம்பலம்